حوار بينى وبينك

ب : الزعيم عبد الفتاح السيسى زعيم الامه العربيه.
ا   : تمام بس احنا محتاجين رئيس لجمهوريه مصر العربيه .
ب :انت شكلك خروف .بقولك زعيم الامه العربيه ضرب داعش والحوثيين والليبين . وتحالف مع روسيا ودول الخليج .
ا : انا مش بنكر دة بس احنا عايزين رئيس  للمصريين يضرب الزباله الى فى كل مكان يضرب الفساد والفقر والجهل يضرب التحرش والتخلف . رئيس  للمصريين يتحالف مع الغلابه والفلاحيين والعمال والمرضى الى مش لاقيين علاج يتحالف مع وزارة السياحه ووزارة الاثار والداخليه والتعليم والرياضه والصناعه والاستثمار .
انا خايف اقولك اننا محتاجين رئيس يهتم بمصر والمصريين وخلى الزعيم عبد الفتاح السيسى زعيم الامه مش عايزين نغيرة خليه زعيم وسفير ووزير دفاع وملك وسلطان واله كمان لو حبيت .
ب : على فكرة انا بدات اتعصب وشكلك كدة عميل للبرادعى و6 ابريل والامريكان . الزعيم عمل قناة السويس الجديدة والعاصمه الجديدة والارياف الجديدة يعمل ايه تانى الراجل اما انكوا شعب نمرود صحيح ماينفعش معاكم غير مبارك وصدام والقذافى .
ا : ماهو بالرغم من كل الحاجات الجديدة الى عملها الزعيم انت لسه مش لاقى شغل وابوك بيكمل الشهر سلف وامك مش قادرة تتعالج وحتموت من المرض . والزباله فى كل مكان والسياحه مضروبه والناس حالها واقف والتعليم زى الزفت والشرطه رجعت تانى تبهدل فى الناس . انت شخصيا ماتقدرش تقول على الزعيم كلمه وحشه او تعارضه او تنتقدة لانهم حيعتقلوك .
ب : ياعم الراجل بقاله سنه واحدة هو يعنى معاه فانوس سحرى .
ا : فهمتكم فهمتكم احنا نستنى 30 سنه كمان عشان الزعيم ياخد فرصته .