سرد لاحداث اليوم من شخص كان موجود اليوم في العباسية
Joana Ahmed
السلام عليكم ..... رغم تعبى الشديد الشديد من احداث اليوم الا انى فى حزن عميق عميق جدا جدا من اللى حصل وعرفت حاجات النهاردة مكنتش هصدقها الا حينما رايتها بعينى واقسم بالله اقسم بالله كل كلمة هقولها حصلت لا زيادة والا اقل ........... كنا منظمين مسيرة جامع الفتح ودعينا ليها وكانت المسيرة كبيرة كبيرة جدا وغير مسبوقة والهتاف كان من قلب الناس وكل اللى فيها ثوار وناس محترمة جدا وصلنا عند كوبرى غمرة الناس قبلتنا بترحاب شديد وهتفوا معانا وكانوا من اهالى المنطقة وناس موجودة بالصدفة ووصلنا العباسية ودخلت المسيرة الاعتصام ووصلنا عند الاسلاك الشائكة كان فى ناس كتير جدا جدا واقفة وهتفنا .... الا انة فجاة لاقينا عيال بتاخد الطوب اللى فى الارض وعاوزة تروح عند الاسلاك الشائكة مسكناهم ورفضنا انهم يعملوا كدة فى اللحظة دى لاقينا طوب بيترمى من ناحية المتظاهرين فجرينا على الصفوف الامامية عشاننوقف الضرب دة لاقينا الجيش ماسك متظاهر عدى من السلك الشائك وبيضربة بمنتهى القسوة امام المتظاهرين بقسوة غير عادية وكانهم عاوزين يحصل استفزاز ولما لاقينا الناس كلها غاضبة وبدات تهتف اقسم بالله اقسم بالله لاقينا قنبلتين غاز اضربوا على الصفوف الامامية والشرطة العسكرية حدفوا طوب بس مش كتير وامام الغضب الشديد الناس ابتدت تحدف طوب واصبحت المسائلة فى تصاعد بين الجانبين وخارج السيطرة لاننا مش قادرين نقول للناس ما يضربوش وفى نفس الوقت العسكر ابتدوا يضربوا طوب جامد جدا .... واقسم اقسم بالله ما فيش حد كان معاة مولوتوف زى ما كدب الملا ولو حد شاف مولوتوف يقول
واستمر ضرب الطوب وشوية جت عربية المية وعربية تانية بيرشوا المية بس المية ريحتها غريبة واللى يتعرض للشمس جلدة يحرقة فابتدنا الناس تغسل جسمها بانهم رجعوا ورا يغسلوا نفسهم وفجأة لاقينا الشرطة العسكرية شالت الاسلاك الشائكة وابتدت تتقدم وبيضربوا طوب بشدة بشدة واحنا بنرجعوفجأة ايضا لاقينا المدرعات خارجة من جوا بيضربوا رصاص حى مش عارف ادا كان صوت والا حى والا اية طبعا كلنا جرينا واللى كان بيقع تحت ايد الشرطة العسكرية بيتفرم رغم انهم عارفين انهم شباب الثورة وستات واطفال وشيوخ مش عاوز اقولكم حصل معاهم اية ورجعنا لغاية الميدان وتوقفت المدرعات ولاقينا كمية مدرعات ودبابات جاية من كل ناحية وبيضربوا نار بكثافة شديدة كلنا جرينا فى كل اتجاة اللى راح ناحية العباسية واللى راح ناحية جامع النور واللى راح فى اتجاة غمرة من جنب شريط المترو وكانت المفجأة ان البلطجية مستنيا فى كل حتة ومش هقول زى مايكونوا عارفين اللى هيحصل ... لا كانوا عارفين اللى هيحصل وانا كنت من الناس اللى فتحلهم اهالى العباسية ممرات امنة لكن البلطجية كانت اعدادهم مهولة وبيضربوا بالشوم والسكاكين عرفت وقتها وتاكدت ان الطرف التالت دة ليس لة وجود واهوة البلطجية كانوا مع الجيش فى ضرب المتظاهرين لانهم كانوا فوق كوبرى اكتوبر بيحدفوا طوب على المتظاهرين وهما خارجين من تحت النفق
المهم وصلت من الشوارع الجانية بعد عداب لغاية غمرة وكانت مفجأة من العيار الثقيل واللى شفتة اقسم بالله هقولة بالحرف الواحد لاقيت 3 مدرعات واقفين تحت الكوبرى وبيضربوا نار بكثافة شديدة شديدة جدا بالظبط زى اللى بنشوفة فى سوريا ويمكن اكتر المدرعات لفت ورجعت تانى وضرب النار شغال بس انا ما شوفتش حد بيقع او اصيب ومش عارف هما بيضربوا على مين ورجعوا تانى وشفت منظر فى منتهى الغرابة لاقيت العساكر فوق المدرعات بترقص وبيضربوا نار فى الهواء وفرحانين جدا جدا بيشوروا للناس تعالوا ورانا .. الناس بقى اللى واقفة اللى كانت بتهتف لينا واحنا ماشيين لاقيتهم بيهتفوا الجيش والشعب ايد واحدة ومشوا معاهم لغاية كوبرى احمد سعيد وما شفتهمش بعد كدة المنظر الل شفتة اقسم بالله نفس المنظر اللى شفتة فى سوريا وعساكر بشار بيرقصوا ويهللوا ولاقيت عسكرى ماسك صورة كبيرة للمشير وبيهتف بقوة وبيبوس الصورة ..... وقتها عرفت ان اللى بيقود الثورة المضادة هو الجيش والناس اللى بتساندة هما اتباع النظام السابق وامنت تماما بكدة لانى شفت دة بعينى تماما
ولاقيت البلطجية اتجمعوا واى حد بيضربوة وطبعا دول مش اهالى المنطقة لانهم لو كدة كانوا عرفوا انى غريب لكن لحسن حظى انى فضلت واقف مدة معاهم وبعد شوية لاقيت قوات جيش كتيرة جدا جدا جدا طالعة من كل ناحية انا قلت فى نفسى اكيد هياخدونى وقفت لكنهم عدوا من جانبى ومعاهم بلطجية ماكين شوم وسكاكين وسنج وكل واحد من الجيش بيحكى عن اللى عملة واللى ضربة ولما لاقيتهم كدة مشيت معاهم عشان اتاكد بنفسى ان البلطجية اللى بيضربوا الثوار طول السنة اللى فاتت تبع لجيش مش حد تانى زى ما كنا فاكرين غفعلا اتكدت تماما تماما ان البلطجية مع عساكر الجيش علاقة قوية جدا والناس اللى كانت بتهتفلنا بيقوللهم برافوا عليكم جدعان ... اتفففففوووووووووووووووو على دة شعب .... المهم فضلت ماشى معاهم وانا رايح على ميدان العباسية وكانى بلطجى ماشى مع بتوع الجيش ومدرعات الجيش اللى راجعين على ميدان العباسية بصراحة بعد ما عديت الكاتدرائية وشفت جامع النور والبلطجية والعسكر بيهتفوا المشير ريسنا وتسقط الثورة وابونا راجع راجع اقسم بالله اقسم بالله واقسم بالله انا كنت ماشى وسطهم وهما بيهتفوا كدة وبصوت عالى وتقدروا تسالوا اى حد من اهالى المنطقة ... انا خفت اكمل معاهم احسن يعرفوا حقيقتى ويقبضوا عليا فعملت نفسى بشرب من عند بتاع عصير واخرت عنهم شوية لاقيت بلطجى ماسك عصاية بيقولى مش جاى والا اية قلتلة جاى ومصدقت بعدوا شوية وجريت فى شارع جانبى باقصى سرعة
ولما هديت سرعتى وومشيت عادى لاقيت حاجة فى منتهى الغرابة البلطجية اللى ماكين شوم كانوا فى كل حتة لاقيتهم بتخنقوا مع ناس تانية شكلهم غلط جدا وسمعت فلوس وان قلتلة والتانى يقولة خدهم من الباشا والتالت يقول طب نتصل بيهم وعمالين يسبوا الدين لبعض كانوا كتير جدا جدا وسبتهم واكيد هيضربوا بعض وعرفت بعد كدة ان دول البلطجية مع بتوع عزبة ابو حشيش وزمتنهم لحد دلوقت بيموتوا بعض بس عشان اية بالظبط مش عارف وصلت رمسيس مشى تعبت جدا جدا جداونزلت اركب المترو لاقيت كمية امناء شرطة سريين واقفين فى كل حتة وبياخدوا شباب وناس مش عارف لية قلت اية المصيبة دى انا مصدقت هربت من الجيش والبلطجية وبتوع ابو حشيش ..... لكن الحمد لله ركبت المترو واتشهدت بس وقتها حسيت باحساس لايمكن يفاقنى ابدا ابدا .... حسيت ان دى مش بلدى حسيت انى غريب فيها عاوز الحق ومش موجود الناس ماشية زى العبيد زى الغنم لاغين عقولهم وراضين انهم ياكلوا اى حاجة ولو من الزبالة شعب اتعمل فية كل حاجة عشان يبقى مغمى علية كدة وقلت فى نفسى اللى حصل معايا النهاردة يثبت بالدليل القاطع ان المجلس العسكرى عارف كويس جدا ان النظام موجود وبيحمية وعلى اتصال مستمر بية واللى يقولى غير كدة احط صوابعى العشرة فى عنية
شفت شيوخ بتتسحل شفت بنات بتضرب بقسوة شفت ناس دماغها بتتفتح شفت ناس بتضرب من ست سبع عساكر فى وقت واحد اقسم بالله شفت كل حاجة النهاردة بس ما شفتش ناس ماتت رغم ضرب النار اللى كان متواصل ..... والله شهيد على كلمة قلتها
ليست هناك تعليقات:
إرسال تعليق